الحلم

-

حلمت حلم عبيط شويه المفروض أنه اضغاث احلام أو تهيؤات مثلا إلا أنه ينفع رؤيه بحلم فيها بمستقبلى أو كأن عقلي الباطن جمع فيها بأعجوبة كل ما يدور في ذهنى و صاغه فى إبداع فى هيئه حلم !
يبتدى الحلم باسرتي البسيطه ملمومه على الغداء على طاوله مستديره كبيره فى مكان مفتوح و فاضي تماما كأنها صحراء لكن فى نفس الوقت مش متضايقين خالص بالعكس سعداء نوعا ما و كالعاده بنتناقش فى موضوع ما و مش واصلين لنتيجه !
ورغم انى ماشفتش غير والدى بس الا انى كنت حاسس بتواجد العائله كلها و كالعاده طلب منى والدى طلب يخلينى أبعد شويه عنهم فكان فيه شويه شباب بيلعبوا كوره على مسافه قريبه و جمبهم كام واحد تانى قاعدين مشغلين دى جى بس بصوت واطى و مع ذلك طلب منى والدى أطلب منهم يوطوا الصوت شويه و انا رايح لهم و عند العيال الى بيلعبوا كوره و كالعاده الكوره جتلى ف "طفشتها" و بعدين لاقيت ناس بتنده لبعض بصيت لقيت زملاء الماجستير إلى مكملتوش بيتكلموا عن الماجستير و كأنهم كملوا و طبعا واضح عليهم الإرهاق و الجديه و الاستعجال و منهم واحد كان ليه أمانه عندى لسه ماخدهاش لغايه دلوقت المهم سلمت عليهم و مشيت لغايه بتوع الدى جى و طلبت منهم يوطوا الصوت شويه رغم انه كان شبه اختفي و بعدين لقيتنى فجأه قدام بيت مبنى على الطوب مش كامل و بقول لأ لأ قبل مايبقوا بيتين ماينفغش فى اشاره إلى طريقه تفكيرى الأقتصاديه التجاريه البحته و بعدين البيت التانى اتبنى جنبه بسرعه و لاقيتنى واقف على سطحهم مبسوط بعد ما حققت الشرط إلى اشترطته ع نكمل المسيره لكن المره دى مش لوحدى لقيت بنت زى القمر ماسكه ايدى و بنرقص سوا فى منتهى السعاده و قدامنا على سطح البيتين زى حيطه مايله صغيره مش كبيره بس ملهاش سلالم و عاوزين نطلع انا وهى الغريب اننا بنحاول نطلع و احنا ماسكين ايد بعض هى طلعت بسرعه وقبلي و لسه ماسكه ايدى انا بحاول بس مش بكل طاقتى و كاننى بتدلع شويه او تعبت من كتر المحاولات ف مش قادر ابذل مجهود تانى رغم انى اقدر اطلع المهم فضلت ماسكه ايدى لغايه ما طلعنا الرامب ده و بعدها صحيت من النوم !
تفتكروا ده يبقي علامه يا مارد !

تعليقات

إرسال تعليق

المشاركات الشائعة من هذه المدونة

يوميات ‏فار ‏فى ‏طاحونه ‏الهوا

-
من وقت التانى بيتكرر نفس السؤال انا ايه ؟ عايش ليه؟ بعمل ايه؟  الاقي نفسي بجاوب نفس الاجابه  بروح الشغل .. افطر .. اشرب الشاي .. و ماعملش حاجه ! لانى مش مطلوب منى اعمل حاجه و مش حابب إلى بيتطلب منى لو اتطلب اصلا لأنه بيبقي اى هلس و كلام فارغ و انا مش عاوز كده لكن اساسا مش مطلوب منى اعمل حاجه فمابعملش حاجه ! و يعدى اليوم بطييييييئ أو هوا و انا مش عارف اعمل ايه ولا انا قاعد هنا ليه وللأسف مش قادر اسيب الشغل طب لما اسيبه حعمل ايه ؟! و يجي معاد الانصراف و الاقي الناس بتجرى ع تروح ! طب بيجروا ليه ؟ معرفش و الاقى نفسي بجرى معاهم ليه معرفش ماهو لازم اروح يعنى حفضل قاعد في الشغل ؟! منا لازم اروح ليه؟ معرفش! فى الطريق الاقي كله بيجرى طب ليه ؟ معرفش والاقينى بجرى وياهم منا لازم أجرى زيهم والا حسمع ميت كلاكس و شتيمه ليه برضوا معرفش؟ طب انتوا مستعجلين ليه ؟ وراكوا ايه ؟ معرفش و اوصل لغايه الشارع و اركن شويه مش عاوز اطلع البيت طيب و اطلع ليه ؟ يعنى ورايا ايه ؟! مفيش بس لازم اطلع يعنى حفضل فى الشارع ؟! و اطلع و يتحط الغدا .. جعان أو مش جعان لازم اكل ماهو وقت الغدا .. اكلت .. شربت الشاي .. ا...
قراءة المزيد

إنت ‏عايش ‏ليه؟! ‏

-
ذات مساء و بينما كنت اجالس ذات الأفكار اللعينه تلك غارقا بين البحث فى الماضي و ذكرياته المؤلمه و التطلع لذالك المستقبل الذى لا يأتي أبدا عازلا نفسي  في ذلك الكون اللعين الضيق منعزلا عن كل ما هو كائن رافضا كل ما هو مفروض و إذا بي أجد يدى الخامله تحرك تلك الانامل المتكاسله التى انهكها النوم المفرط هربا من دوامات الفكر المميته بمنتهى البطء نحو تطبيق الفيس بوك حتى أقتل قليلا من الوقت هربا من تلك الحرب النازيه المشتعله برأسى و كالعاده لم أكن أقرا أى شئ من تلك التراهات المتعاقبه فقط أتابع أسعار الهواتف الذكيه ثم أظل امرر تلك المنشورات السخيفه لمده لا تتجاوز العشر دقائق ثم أغلق التطبيق و لكن تلك المره لفت نظرى منشور لأحد الأصدقاء القدامى، كنت أعرفه أعرف ذلك الشخص فهو يعانى من الاكتئاب منذ زمن بعيد مثلي تماما.  كان ذلك واضحا تماما فى منشوراته، صوره منفردا، حتى نظراته بتلك الصور تتحدث عن شخص مرهف الحس يتألم وسط عالم من الحلاليف! و رغم أني كنت دائما أبتعد عن التعليق على تلك المنشورات و لكن ليس هربا من الطاقه السلبيه كما كان يفعل معي معظم بل كل من كانوا لدى على أى من حساباتى الكئيبه، بل ...
قراءة المزيد